• Түзүмдүк бөлүктөрдүн жана ведомстволук уюмдардын жаңылыктары

• Борбордук аппарат(143)
• Илим жана инновациялар башкармалыгы(70)
• Жогорку, орто кесиптик жана жогорку окуу жайдан кийинки билим берүү башкармалыгы(23)
• Башталгыч кесиптик билим берүү башкармалыгы(157)
• Мектептик, мектептен тышкаркы жана кошумча билим берүү башкармалыгы(99)
• Мектепке чейинки билим берүү башкармалыгы(35)
• Бюджеттик саясат жана финансылык анализ башкармалыгы(2)
• Инвестициялар, мамлекеттик-жеке өнөктөштүк, мамлекеттик сатып алуулар жана инфраструктура башкармалыгы(3)
• Аккредитация жана сапатты баалоо бөлүмү(22)
• Бухгалтердик эсеп жана отчёттуулук бөлүмү(0)
• Документтик камсыз кылуу жана контролдоо бөлүмү(2)
• Маалыматтык саясат бөлүмү(2281)
• Эл аралык кызматташтык бөлүмү(72)
• Мониторинг, стратегиялык пландоо жана мамлекеттик программаларды талдоо бөлүмү(2)
• Укуктук камсыз кылуу бөлүмү(4)
• Адам ресурстарын башкаруу бөлүмү(45)
• Санариптик трансформация бөлүмү(3)
• Лицензиялоо сектору(2)
• Уюштуруу жана тарбиялоо иши боюнча сектору(3)
• Мамлекеттик тилди өнүктүрүү сектору(30)
• Борборлоштурулган бухгалтерия(0)
• Кыргыз билим берүү академиясы(34)
• Билим берүүнүн сапатын өнүктүрүү департаменти(10)
• Педагогикалык кызматкерлердин квалификациясын жогорулатуу жана кайра даярдоо республикалык институту(54)
• Республикалык дене тарбия, спорт жана маданият боюнча усулдук борбору(79)
• Республиканский научно-методический центр(66)
• “Санарип билим берүү борбору” мамлекеттик мекемеси(1)
• Көз карандысыз сертификациялоо жана валидациялоо борбору(25)
• «Кут билим» медиа борбору(0)
• Дүйнөлүк банктын долбоорлорун ишке ашыруу бөлүмү(92)
• Секторду өнүктүрүү программасы: Инклюзивдик өнүгүү үчүн көндүмдөр(89)
• "Секторду өнүктүрүү долбоору: мектептик билим берүүнү реформалоо"(5)
• «Кыргыз Республикасында билим берүү тармагын колдоо» долбоору(27)
• "Кыргыз Республикасындагы мектептик билим берүү чөйрөсүнүн коопсуздугун каржылоо механизмдерин өнүктүрүү" долбоору(0)
• «Алтын түйүн» улуттук балдар инженердик-техникалык академиясы(0)
• «Сейтек» балдар жана өспүрүмдөр улуттук борбору(0)
• Республикалык балдардын жана өспүрүмдөрдүн экология, аймак таануу жана туризм борбору(0)
• «Санат» ден соолукту чыңдоо борбору(1)
• «Барчын» санатория-профилакториясы(0)
• Аймактар ​​аралык психологиялык, медициналык жана педагогикалык консультация(0)
• Билим берүүдөгү долбоордук демилгелер лабораториясы(1)

ПРЕЗИДЕНТ САДЫР ЖАПАРОВ: БИЗ БИЛИМ МЕНЕН ИЛИМ АРКЫЛУУ ГАНА ӨНҮККӨН ӨЛКӨНҮ, КҮЧТҮҮ МАМЛЕКЕТТИ КУРУУГА ЖЕТИШЕБИЗ

Көрүлдү: 1215

«Биз билим менен илим аркылуу гана өнүккөн өлкөнү, күчтүү мамлекетти курууга жетишебиз. Андыктан силер – билимдүү жаштар өлкөнүн интеллектуалдуу потенциалы, келечектин үмүтү жана таянычы болуп бересиңер», - деп баса белгиледи Кыргыз Республикасынын Президенти Садыр Жапаров бүгүн, 22-декабрда, жыл сайын өтүүчү балдарга арналган Жаңы жылдык балаты иш-чарасында.

Мамлекет башчысынын Президенттик балатыдагы сөзүн толук келтиребиз:

«Кымбаттуу окуучулар!
Кыргызстандын жаркын келечеги болгон балдарым!
Менин кичинекей досторум!

Мынакей жалпы кыргызстандыктар күткөн, айрыкча силер дегдеп күткөн Жаңы жыл да келип калды. Саналуу күндөрдөн кийин силер 2-чейректи жыйынтыктап, Жаңы жылды кубануу жана шаңдануу менен тосуп аласыңар!

 
Балдар үчүн ар бир Жаңы жыл сыйкырдуу майрамдай сезилет. Бала кезде мен дагы силерге окшоп Жаңы жылды абдан самап күтөөр элем. Себеби Жаңы жыл алдында бардык балдар, анын ичинде мен дагы кыялданып, тилек кылып, жаңы максаттарды алдыга коюп, Жараткандан алардын аткарылышын суранаар элек. Силер дагы ошентесиңер, туурабы, балдарым. Андыктан силер дагы кыялданып, алдыга чоң-чоң максаттарды койгула!
 
Мен силерди, дегеле кичинекей досторумдун баарын Жаңы жыл майрамы менен чын жүрөгүмдөн куттуктаймын. Жаңы жыл алдындагы каалоолоруңардын кабыл болушуна, алдыга койгон ой-максаттарыңардын аткарылышына тилектешмин. Себеби, биздин окуучуларыбыз жакшы окуп, мыкты адис болууну, талбай иштеп, ата-энесин кубантууну, аны менен кошо Ата Мекенинин атын чыгарууну, желегин бийик желбиретүүнү каалайт деп бекем ишенем. Ошондуктан 2024-жылы баарыңардын аруу-тилегиңер аткарылсын!
 
Агай-эжейлериңерди, ата-энелериңерди, бизди кубантып, албан-албан ийгиликтерди жараткыла! Аракет кылып, максаттарыңарга жеткиле!
 
Менин кичинекей досторум, биз өтүп бараткан жыл тууралуу да сөз кылып, аны таарынтпай узатып коелу. Мен силердин атыңардан жалпы элибизге бакубатчылык, тынчтык жана ийгиликтерди тартуулаганы үчүн узап бараткан жылга ыраазычылыгымды билдирип, ыракматымды айтам.
 
Чындыгында эле бул жылы ар бир баланын, ар бир үй-бүлөнүн, ошондой эле мамлекеттин эсинде кала турган ийгиликтерге жетише алдык.
 
Силер дагы “2023-жылы мен олимпиададан орун алгам, мен спорттогу жетишкендигим үчүн грамота алгам, мен көркөм өнөр боюнча өлкөмдүн желегин желбиреткем же эң жакын досума жардам бергем” деп, өтүп бараткан жылды жылмаюу менен эстегиле. Ошол көз ирмемдер жүрөгүңөрдө жакшынакай элес болуп көпкө чейин сакталсын.
 
Урматтуу окуучулар, биз келечекке олуттуу карайлы. Себеби кайсы өнүккөн өлкөнү албайлы, алардын эң негизги байлыгы – бул силердей болгон билимдүү балдар. Себеби мектепти жакшы окуп, мекенчил болуп тарбияланып-өсүп, жогорку окуу жайлардан татыктуу кесиптерге ээ болгон жаштар өз өлкөсүн өнүккөн өлкөлөрдүн катарында туруусуна салым кошкондугу тууралуу жүздөгөн, миңдеген мисалдар бар. Алар да өз мектебинен терең билим алуу менен бара-бара өз Мекенинин чыныгы атуулу болушкан.
 
Бүгүнкү күндө сүйүктүү Кыргызстаныбызда балдардын сапаттуу билим алуусуна бардык шарттар түзүлүүдө. Мамлекет жүздөгөн мектептерди салып, сапаттуу китептерди чыгарууга аракеттенип, агай-эжейлериңердин айлык акыларын көбөйтүүнүн үстүндө тынымсыз иштеп жатат. Мунун баары силер үчүн! Силердин чыныгы атуул болуп чыгышыңар үчүн!
 
Биз билим менен илим аркылуу гана өнүккөн өлкөнү, күчтүү мамлекетти курууга жетишебиз. Андыктан силер - билимдүү окуучулар өлкөнүн интеллектуалдуу потенциалы, келечектин үмүтү жана таянычы болуп бересиңер.
 
Азыркы заман – билимдин, жаңы технологиянын, интеграциянын заманы. Силер ушундай жаңы чакырыктар менен бирдей кадам шилтеп, дүйнөлүк жаңылыктардан артта калбай, билим-илимди терең өздөштүрүүгө умтулушуңар зарыл. Санарип технологияларды, көп тилдерди өздөштүрүп, жаңы ойлоп табууларды жаратууга аракет кылышыңар керек. А биз болсо силердин аракетиңерди ар тараптан колдоого даярбыз.
 
Ардактуу жеткинчектер!
 
Силердин ар кандай райондук, облустук, республикалык олимпиадалардан, кароо-сынактардан, эл аралык, дүйнөлүк мелдештерден байгелүү орундарды алганыңарды укканымда аябай сыймыктанам.
 
Силердин жеңишиңер – жалпы Кыргызстандын сыймыгы! Сыймык чоң же кичине деп бөлүнбөйт. Силердин жеңишиңер жашоодогу ийгилигиңердин алгачкы кадамы! Баштапкы кадамдар тынбай шилтенсе, жаркын келечектин жолуна алпарат. Бирок ар бир жеңиштин артында тынымсыз эмгек, өжөрлүк, каалоо жана намыс турат.
 
Бул деген – убакытты туура пайдалануу менен китептерди көп-көп окуу, ата-энелериңерге жардам берүү, сергек жашоо образы менен жашоо деген сөз!
 
Өз мезгилинде Айкөл Манас атабыз да эл-жерин коргоп, ата салты, нарк-насили менен кыргыз элин атак-даңкка жеткирген. Эл-жерин өнүктүрүп, намыска бек эр-азаматтарды, балбан билек баатырларды, акылы тетик уул-кызадарды тарбиялап, учу-кыйырсыз аймактарга ээлик кылган. Ошол эле Барсбек, Алп сол, Тагай бий жана башка бабаларыбыз улуу мамлекеттерди курушкан.
 
Мына ошол аталардын жолун улап, Кыргызстанды андан ары өнүктүрүп-өстүрүү силердин колуңарда! Бул азыр кыял-тилегиңер болсо, эртең алар сөзсүз иш жүзүнө ашат. Аракет кылсаңар – берекети болот, ой-максатыңар сөзсүз орундалат!
 
Анда эмесе, Кыргызстандын жалпы келечек ээлери!
 
Жаңы жылыңар менен дагы бир жолу куттуктаймын.
Асманыңар ар дайым ачык болуп, бактылуу балалыктын ээси болгула!
Өнүккөн өлкө курам деген кыялыңардан тайбагыла!
Ата-энеңерге, агай-эжейлериңерге, досторуңарга менден салам айта баргыла!
 
Жаңы жылыңар кут болсун!».

Бөлүшүңүз