“АКЫЛМАН” ПРЕЗИДЕНТТИК ЛИЦЕЙИ 2025-2026-ОКУУ ЖЫЛЫНА КАРАТА КОНКУРСТУК ТАНДООНУ ЖАРЫЯЛАЙТ

Автор: Маалыматтык саясат бөлүмү

17 Март 2025 ж. 10:42

Көрүлдү: 499

Жаңы окуучуларды кабыл алуу үчүн “Акылман” президенттик лицейи 2025-2026-окуу жылына карата конкурстук тандоону жарыялайт.

Конкурстук тандоого учурда Кыргызстанда жайгашкан окуу жайлардын биринде 6-класста окуп жаткан окуучулар катыша алышат.

Конкурстук тандоо 3-этаптан турат, 1-2-тур – бул test.akylman.edu.kg сайты аркылуу онлайн тестирлөө, ал эми 3-тур – ар бир облуста жеринен өткөрүлө турчу оффлайн тестирлөө.

1-2-этаптын онлайн тестирлөөсүнө катышуу үчүн test.akylman.edu.kg cайтына катталуу 2025-жылдын 1-апрелинен баштап, 14-апрелге чейин уланат.

1-тур 18-19-апрель күндөрү онлайн форматта, 2-тур 23-24-апрель күндөрү онлайн форматта, ал эми 3-тур 1-майдан 8-майга ар бир облуста жеринен өткөрүлөт. Жыйынтыгында, 3 этаптын баарынан тең ийгиликтүү өткөн эң алдыңкы 72 окуучу лицейге 7-класска кабыл алынат.  

Конкурстук тандоого катышуу үчүн талапкерлер бул талаптарга ылайык келүүсү зарыл:

1) Кыргыз Республикасынын жалпы билим берүү уюмдарында азыркы учурда 6-класста окуусу; 

2) Кыргыз Республикасынын жараны болуусу;

3) “Жакшы”, “эң жакшы” деген баага окуусу, башкача айтканда, ударник же отличник болуусу.

Талапкер бардык 3 талапка туура келген гана учурда, конкурстук тандоого катышып, өз күчүн сынай алат!

Конкурстук тандоо кийинки предметтерден турат: 1-2-тур – математика, логика, кыргыз тили, орус тили жана тарых. 3-тур –математика, логика, кыргыз тили жана англис тили.

Лицейге кабыл алуу конкурстук тандоонун гана негизинде жүрөт жана окуучунун үй-бүлөлүк социалдык абалы каралбайт. Демек, социалдык статусуна карабастан, конкурстук тандоого катышуу үчүн бардык окуучуларга бирдей мүмкүнчүлүк берилет. “Акылман” президенттик лицейине өткөн окуучулар 100% мамлекет тарабынан камсыздалынат, андыктан окутуу акысыз. Ал эми лицейде окутуу кыргыз жана англис тилдеринде жүргүзүлөт. Мындан улам, орус тилдүү класстар жок экенин кабарланат.

Бөлүшүңүз