“АКЫРКЫ КОҢГУРОО” САЛТАНАТЫН ӨТКӨРҮҮ ТУУРАЛУУ БУЙРУК ЧЫКТЫ

Автор: Маалыматтык саясат бөлүмү

10 Май 2023 ж. 13:36

Көрүлдү: 3365

Билим берүү жана илим министри Каныбек Иманалиевдин республиканын жалпы билим берүү уюмдарында 2022-2023-окуу жылын уюшкандыкта жыйынтыктоо жана салтанаттуу иш-чараларды өткөрүү убагында бүтүрүүчүлөрдүн өмүрүнүн коопсуздугун сактоо максатында буйругу чыкты.

Буйрукка ылайык, “Акыркы коңгуроо” салтанаты 2023-жылдын  25-майында саат 9.00дө өтөт.

Республиканын менчигинин түрүнө карабастан жалпы билим берүү уюмдарынын директорлоруна салтанаттуу иш-чараларды өткөрүүгө мыйзамсыз түрдө акча жана башка чогултууларды жыйноого, ошондой эле бүтүрүүчүлөр жана алардын ата-энелеринин катышуусунда “Акыркы коңгуроо” салтанатынан сырткары иш-чараларды уюштурууга тыюу салынат.

“Акыркы коңгуроо” салтанаттуу иш-чарасын өткөрүүдөгү коопсуздук чараларын камсыз кылуу жоопкерчилиги билим берүү уюмдарынын жетекчилерине жүктөлөт.

Бишкек, Ош шаардык билим берүү башкармалыктарынын жана райондук, шаардык билим берүү бөлүмдөрүнүн жетекчилери төмөндөгүлөрдү аткарууга тийиш:

• райондук жана шаардык билим берүү бөлүмдөрүнүн жооптуу кызматкерлери тарабынан күнү-түнү күзөт уюштуруу;
• билим берүү уюмдарынын аймагынан тышкары өткөрүлгөн салтанаттуу иш- чараларда  окуучулардын өмүрүнүн коопсуздугуна  ата-энелер   жооптуу экени тууралуу түшүндүрүү иштерин жүргүзүү.

Эскертүү! Буйрукту аткарбаган билим берүү уюмдарынын жетекчилерине кызмат орундарынан бошотууга чейинки тартиптик чаралар көрүлөт.

Бөлүшүңүз