ТАЛАС ОБЛУСУНУН ЖАЛПЫ БИЛИМ БЕРҮҮ УЮМДАРЫНЫН ДИРЕКТОРЛОРУ ҮЧҮН 3 КҮНДҮК ОКУТУУ БАШТАЛДЫ

Автор: Маалыматтык саясат бөлүмү

31 Март 2023 ж. 11:43

Көрүлдү: 2616

Бүгүн, 31-мартта Талас мамлекеттик университетинде Талас облусунун жалпы билим берүү уюмдарынын директорлору үчүн “Билим берүүдөгү натыйжалуу менеджмент” аталышындагы 3 күндүк семинар башталды.

Семинарга билим берүү жана илим министри Каныбек Иманалиев, министрдин орун басары Токтобүбү Ашымбаева, Мектептеги билим берүү жана китеп чыгаруу саясаты башкармалыгынын башчысы Кыялбек Акматов, Президенттин Талас облусундагы ыйгарым укуктуу өкүлү Нурлан Дарданов , Кыргыз Республикасынын Эл мугалими Бектур Исаков ж.б. катышууда.

Каныбек Иманалиев мектеп директору мамлекет акча берет деп күтпөй, өзү долбоор жазып, инвестиция тарткан менеджер болушу керектигин айтты.

“Мыкты мектеп директору эң биринчи эмгек жамаатта ынтымакты камсыздашы керек. Мектептин ынтымагын камсыз кыла албаган директор, кантип өнүгүүнү камсыздайт. Эгерде мектепте кандайдыр бир чыр болуп жатса, ага директор күнөөлүү. Ар бир мектеп директору өзүнүн өнүгүү багытын, приоритетин өзү аныктайт. Жетекчи күн сайын сабаттуулукка, жаңычылдыкка, инновацияга умтулушу керек. Окуучу 11 жыл окуса, мугалим өмүр бою окуйт. Дүйнөдө билими күчтүү болгону үчүн держава менен тең тайлашкан өлкөлөр бар. Буга мисал катары Эстония өлкөсүн айтсак болот”, - деди министр.

Ошондой эле министр Каныбек Иманалиев билим бул – билим гана эмес, ден соолук, рухий байлык, коопсуздук, чек ара экендигин белгилеп, билими бар эл гана өзүнүн суверенитетин коргой аларын кошумчалады.

Окутуунун жүрүшүндө “билим берүү системасындагы эмгек укуктарынын жөнгө салынышы”, “мектептин өнүгүү планы” “инвестицияларды тартуу боюнча мектептин иш тажрыйбасынан” темаларында презентациялар жасалат.

Мындан сырткары катышуучулар “Жалпы билим берүү уюмдарынын менеджментин өнүктүрүүнүн ыкмалары, усулдары, каражаттары”, “Мектепке инвестиция тартуу үчүн долбоор жазуу”, “Жалпы республикалык тестирлөөгө даярдануу (ЖРТ)”, “Эл аралык PISA программасына даярдануу” темаларында 4 топко бөлүнүп иштешет.

Окутуунун максаты – Жалпы билим берүү уюмдарынын жетекчилерине учурдун талабына ылайык заманбап натыйжалуу менеджерлик башкаруунун усулдары, ыкмалары, каражаттары менен тааныштыруу жана талкулоо, жеке иш тажрыйбалары менен бөлүшүү, билим берүү уюмдарына каражат тартуу боюнча долбоор жазууну үйрөнүү, эл аралык PISA программасына, жалпы республикалык тестирлөөгө окуучуларды даярдоо боюнча тажрыйба алмашуу.

Эскерте кетсек, семинар 31-марттан 2-апрелге чейин созулат. Семинардын программасы менен бул жерден тааныша аласыз.

Бөлүшүңүз