2026–2027-ОКУУ ЖЫЛЫНА КАРАТА 11 ЖАНА 12 ЖЫЛДЫК БИЛИМ БЕРҮҮ ҮЧҮН БАЗИСТИК ОКУУ ПЛАНДАРЫ БЕКИТИЛДИ

Автор: Маалыматтык саясат сектору (МСС)

27 Июль 2026 ж. 11:29

Көрүлдү: 499

Кыргыз Республикасынын Агартуу министрлиги 2026–2027-окуу жылына карата 11 жылдык мектептик билим берүү жана 12 жылдык окуу мөөнөтүнө этап-этабы менен өтүүчү класстар үчүн базистик окуу пландарын бекитти.

12 жылдык билим берүүгө этап-этабы менен өтүүнүн экинчи этабында 1, 2, 3, 5, 7 жана 8-класстарда окуу процесси жаңыланган билим берүү программалары жана окуу-методикалык комплекстери менен жүргүзүлөт. Мындан тышкары, жаңы окуу жылынан тартып 8-класстарга жумасына 2 сааттык профилге чейинки компонент киргизилет.

Ошол эле учурда, 11 жылдык мектептик билим берүү системасы боюнча окуусун уланткан 3, 4, 9, 10 жана 11-класстарда окуу процесси «Чет тили» предмети боюнча (3–9-класстар) колдонулуучу окуу-методикалык комплекстеринен тышкары, 11 жылдык мектеп үчүн иштелип чыккан билим берүү программаларынын жана окуу-методикалык комплекстердин негизинде жүргүзүлөт.

Бекитилген базистик окуу пландарына ылайык, өлкөдө өткөрүлө турган ири мамлекеттик жана эл аралык иш-чараларга байланыштуу республиканын бардык жалпы билим берүү уюмдарында 2026–2027-окуу жылы 2026-жылдын 15-сентябрында башталып, 2027-жылдын 25-майында аяктайт.

Жайкы каникул мезгили эсепке алынбаганда окуу жылынын узактыгы 1-класста – 32 жуманы, 2-класста – 33 жуманы, ал эми 3–11-класстарда 34 жуманы түзөт.

2026–2027-окуу жылындагы мектептик каникулдардын графиги:

– күзгү – 5 календарлык күн (2026-жылдын 11–15-ноябры, сабактар 2026-жылдын 16-ноябрынан улантылат);

– кышкы – 10 календарлык күн (2027-жылдын 1–10-январында, сабактар 2027-жылдын 11-январынан улантылат);

– жазгы – 6 календарлык күн (2027-жылдын 3–8-мартында, сабактар    2027-жылдын 9-мартынан улантылат);

– майдагы (майрамдык) – 9 календарлык күн (2027-жылдын 1–9-майында, сабактарга 2027-жылдын 10-майында кайтышат).

Мындан тышкары, 1-класстын окуучулары үчүн мектептик каникулдар эки жумага, ал эми 2-класстын окуучулары үчүн бир жумага кошумча узартылат.

Бөлүшүңүз