МИНИСТРЛИКТЕ ИНКЛЮЗИВДҮҮ БИЛИМ БЕРҮҮНҮ ӨНҮКТҮРҮҮ МАСЕЛЕЛЕРИ ТАЛКУУЛАНДЫ

Автор: Маалыматтык саясат сектору (МСС)

16 Апрель 2026 ж. 13:01

Көрүлдү: 287

14-апрелде, Агартуу министрлигинде министрдин орун басары Надира Джусупбекова атайын жалпы билим берүү уюмдарынын, психологиялык-медициналык-педагогикалык консультациялардын (ПМПК) жетекчилери жана ата-энелер коомчулугунун өкүлдөрү менен жумушчу жолугушуу өткөрдү.

Жолугушууда катышуучулар инклюзивдүү билим берүүнүн учурдагы абалын талкуулап, мектептер, адистер жана үй-бүлөлөр туш болуп жаткан негизги көйгөйлөрдү белгилешти, ошондой эле ийгиликтүү тажрыйбаларды жана натыйжалуу чечимдерди сунушташты.

Өзгөчө көңүл ПМПКнын баланын билим берүү муктаждыктарын аныктоодогу жана анын жеке билим берүү маршрутун коштоп жүрүүдөгү ролуна бурулду. Диагностиканын сапатын жогорулатуу, кызмат көрсөтүүлөрдүн жеткиликтүүлүгүн камсыз кылуу жана ата-энелер менен өз ара аракеттенүүнү жакшыртуу маселелери талкууланды.

Атайын билим берүү уюмдарынын жетекчилери системадагы оң өзгөрүүлөрдү белгилеп, жаңы ыкмаларды киргизүү жана балдардын жеке өзгөчөлүктөрүнө көңүл буруу күчөгөнүн айтышты. Ошондой эле кадрларды даярдоо жана окутуу методикаларын жаңыртуу боюнча маселелер белгиленди.

Ата-энелер коомчулугунун өкүлдөрү өздөрүнүн күтүүлөрүн жана күнүмдүк кыйынчылыктарын айтып, чечим кабыл алууда алардын пикирин эске алуунун маанилүүлүгүн белгилешти. Алар мамлекеттик органдар жана адистер менен тыгыз кызматташтык балдарды натыйжалуу колдоого өбөлгө түзөрүн билдиришти.

Жыйынтыгында министрдин орун басары инклюзивдүү билим берүүнү өнүктүрүү бардык тараптардын биргелешкен аракетин талап кыларын белгилеп, айтылган сунуштар министрликтин мындан аркы ишинде эске алынарын билдирди.

Бөлүшүңүз