КЫРГЫЗСТАНДЫК СТУДЕНТТЕР РОССИЯДА ӨТКӨН “ПРОФЕССИОНАЛДАР” ЧЕМПИОНАТЫНАН БАЙГЕЛҮҮ КАЙТЫШТЫ

Автор: Маалыматтык саясат бөлүмү

2 Декабрь 2024 ж. 12:50

Көрүлдү: 1103

2024-жылдын 26-30-ноябрында Россия Федерациясынын Билим берүү министрлиги жана «Кесиптик билим берүүнү өнүктүрүү институту», Федералдык мамлекеттик бюджеттик кошумча кесиптик билим берүү мекемеси - кесиптик чеберчилик боюнча Бүткүл россиялык чемпионат кыймылынын федералдык оператору тарабынан уюштурулган «Профессионалдар» чемпионатынын финалы Санкт-Петербург шаарында өттү.

Чемпионаттын финалына К. Көлбаев атындагы Бишкек автомобиль-жол колледжинин, И. Раззаков атындагы Кыргыз мамлекеттик техникалык университетинин Бишкек техникалык колледжинин, Б. Сыдыков атындагы Кыргыз-Өзбек эл аралык университетинин кесиптик колледжинин жана № 99 кесиптик лицейдин студенттери катышты. 

Чемпионаттын жыйынтыгында Бишкек техникалык колледжинин студенттери 2 күмүш, Бишкек автомобиль-жол колледжинин студенттери 1 күмүш, 2 коло медаль алышса, Кыргыз-Өзбек эл аралык университетинин кесиптик колледжинин студенттери 1 күмүш медаль утушту.  

Белгилей кетсек, “Профессионалдар” чемпионаты экономиканын түрдүү тармактарында кадрларды өнүктүрүүгө багытталган жана бул чемпионат сынактарды гана эмес, ишкердик, көргөзмө жана маданий программаларды да камтыйт.

Бөлүшүңүз